HARAMBIR NI SILINDUNG

Harambir ni silindung naung masak 
Akka dekdek akka dabu tu bonana
Ai nungnga mabuk so minum jala marsak
Mida pangeolni si boru namarbaju

Dirippu do adong boruni halak
Da buaton ni lagak lagak ni sipatu
Ianggo so torang do dibagasan adat
Ba tung boha indada haoloan au

Lao au tu jabu laho modom
Hu dapothon tu podoman ni dainang
Ditorui si doli i patunggoromon
Ditaonton ibana ngali ngalian

Indada boi paoto-otohon
Ianggo jolma naung somal marpikkiran
Ianggo tung malo ni hata do dohonon
Nga tung boha hujaga do borngin arian

Lao au marmeam tu alaman
Mundur undur doli doli dipudikku
Unang ho ito loja marangan-angan
Naung adong do na jinorat ni nipikku

Hubuat ma napuran sian tangan
Denggan mai atupan ni jari jarikku
Lehononku tu doli dongan marpadan
Bodarion ma pamasukon sian pintu

Nakkok au tu dolok ni sipira
Tuat au tu toruan ni parbaba
Unang ho ito holan ripe marnida
Sinamotmu ma papungu tu amatta

Huhut majo sinukkun pangatiha
Dohot datu na ummalo mangarasa
Manang denggan do domu marsaripe hita
Unang bahen holan dippol dippol dimata

Ido nuaeng hujalo sipodaon
Sian sude akka natua-tua nahinan
Molo tu jolo ninna hape ni lakkahon
Tu pudi ikkon manat marpanarian

Jotjot doi tutu diparbogason
Naung saut gabe olo do gabe marsirang
Ima tutu nagabe hailaon
Tarsongon taktak naso olo haburian

Asa nuaeng pe sidohononku
Tu sude dongan dongan akka nalao muli
Ikkon manat do jolo ikkon pikkiranmu
Unang ho gabe sumolsoli di pudi

Sala doi tutu diboru boru
Molo sude do hata pittor dialusi
Ianggo rupa do nalao berengonmu
Pangalaho dang jumolo dipikkiri